समृद्धिको लागि संघीयता र लोकतन्त्र संस्थागत हुनुपर्ने : उपेन्द्र यादव

संघीय सरकारका उपप्रधान एवम् स्वास्थ्य तथा जनसंख्यामन्त्री उपेन्द्र यादवले आर्थिक विकास र समृद्धिको लागि संघीयता र लोकतन्त्र संस्थागत हुनुपर्नेमा जोड दिनुभएको छ।

महोत्तरी जिल्लाको प्रादेशिक अस्पताल जलेश्वरमा ब्लड बैंकको उद्घाटन तथा प्रशासकीय भवनको शिलान्यास कार्यक्रममा प्रमुख अतिथीको रुपमा जनता समाजवादी पार्टीका अध्यक्ष समेत रहनुभएका यादवले त्यस्तो बताउनुभएको हो।

उहाँले जनताको लागि धेरै सुविधामध्ये स्वास्थ्य र शिक्षा महत्त्वपूर्ण भएको बताउनु हुँदै देशमा संघीयता संस्थागत नभएसम्म नागरिकको पहुँचमा यी सेवा पुग्न समस्या हुने बताउनुभयो।

जनताको सेवा पहुँचमा संघीयता, गणतन्त्र र लोकतन्त्र महत्त्वपूर्ण भए पनि यसको संस्थागत विकासमा अवरोध ल्याउन केही व्यक्तित्त्व लागि परेको बताउनु हुँदै संघीयता र लोकतन्त्र संस्थागत नभए राजनीतिक स्थिरता हुने बताउनुभयो।

राज्य स्थिरता भयो भने सुशासन सम्भव नहुने र सुशासन नभए देशमा भ्रष्टाचार र कुरीति बढेर राज्यबाट जनतालाई पाउने सुविधामा अवरोध आउन सक्ने भएकोले देशमा संघीयताको विकल्प नभएको बताउनुभयो।

मधेश प्रदेशको जनकपुरमा मधेश स्वास्थ्य विज्ञान प्रतिष्ठान, राजविराजमा रामराजाप्रसाद सिंह स्वास्थ्य विज्ञान प्रतिष्ठानलगायतका संघीयताकै देन भएको बताउनु हुँदै उहाँले संघीय सरकार र मधेश प्रदेश सरकार स्वास्थ्य क्षेत्रको विकासमा हरसम्भव प्रयास गरिरहेको बताउनुभयो।

प्रादेशिक अस्पताल जलेश्वरमा भौतिक निर्माण अन्तर्गत प्रशासकीय भवनको शिलान्यास गरिएको र भवन निर्माणपछि बिरामीलाई उपचारको सेवा, सुविधामा सहजता आउने बताउनुभयो।

त्यसैगरी कार्यक्रममा मधेश सरकारका स्वास्थ्य तथा जनसंख्या मन्त्री शत्रुधनप्रसाद सिंहले आफू फूलमाला लगाउन मात्रै अस्पतालको अनुगमनमा नजाने बताउनुभयो।

जसपा नेपालका केन्द्रीय सदस्य तथा पूर्व कृषि मन्त्री हरिनारायण यादवले विगतमा रेफर अस्पतालको रुपमा रहेको प्रादेशिक अस्पताल जलेश्वरले सेवा दिएर छवि सुधार्नमा लागेकोमा खुशी व्यक्त गर्नु हुँदै यसक्षेत्रका जनतालाई सहज र गुणस्तरीय स्वास्थ्य सेवा प्रदान गर्न स्वास्थ्यकर्मीलाई आग्रह गर्नुभयो।

Leave a Reply

Your email address will not be published. Required fields are marked *