प्रधानमन्त्री तथा कुलपति पुष्पकमल दाहालले मंगलबार त्रिभुवन विश्वविद्यालय सेवा आयोगको अध्यक्षमा प्रा.डा. घनश्याम भट्टराईलाई नियुक्त गर्नु भएको छ। उहाँ प्राध्यापक संघ केन्द्रीय क्याम्पस कीर्तिपुरका पूर्व अध्यक्ष हुनु हुन्थ्यो । शिक्षामन्त्री तथा सहकुलपति अशोककुमार राई अध्यक्षताको समितिको सिफारिसमा भट्टराईलाई अध्यक्ष नियुक्ति गरिएको प्रधानमन्त्री तथा मन्त्रिपरिषद् कार्यालय स्रोतले जनाएको छ । नवनियुक्त अध्यक्ष भट्टराई इतिहास केन्द्रीय विभागका प्राध्यापक हुनु हुन्छ । उहाँ सत्तारुढ कांग्रेस कोटाबाट अध्यक्ष नियुक्तिका लागि सिफारिसमा परेको शिक्षा मन्त्रालय स्रोतले जनायो । समितिले ३ जनाको नाम सिफारिस गरेको थियो । प्राध्यापकद्वय निलम श्रेष्ठ प्रधान र टंकनाथ धमला पनि सिफारिसमा परेका थिए । प्रधानमन्त्री सचिवालयका एक सदस्यले मेरिटको आधारमा भट्टराईलाई नियुक्त गरिएको दाबी गर्नु भएको छ। त्रिवि सेवा आयोगले एक वर्ष अध्यक्ष पाएको हो । २०७९ साउन १८ गते आयोग अध्यक्षविहीन छ । अध्यक्ष नहुँदा अध्यापक कर्मचारी छनौट र बढुवाको काम ठप्प छ । गत वर्ष अध्यक्ष नियुक्ति गर्न शिक्षा मन्त्रालयले आवेदन माग गर्दा ३८ जनाले दरखास्त दिएका थिए ।
