पाकिस्तानमा जाफर एक्सप्रेस रेलमा आक्रमण गरी यात्रीलाई अपहरण गरेको जिम्मा बलुच लिबरेसन आर्मी (बीएलए)ले लिएको छ ।पाकिस्तानी सेनाले यात्रीहरुलाई अपहरणमुक्त गराउने प्रयास जारी राखेको छ । सैनिक अप्रेसनको २४ घण्टाको अवधिमा २७ अपहरणकारी र ३० सैनिक मारिएका छन् । साथै १५५ जनालाई अपहरण मुक्त गराइएको पाकिस्तानी अधिकारीहरुले बताएका छन् ।
बलुच लिबरेसन आर्मी (बीएलए)को हतियारधारी समूहले मंगलबार क्वेटा शहरबाट पेशावर सहरतर्फ गइरहेको रेललाई बीच बाटोमा आक्रमण गरेर त्यहाँ सवार यात्रुहरुलाई अपहरण गरेको थियो । समाचार एजेन्सी एएफपीका अनुसार रेलमा सवार ४०० बढी यात्रीहरुमध्ये २१५ जना यात्रु अपहरणमा परेका थिए । यात्रीहरुमा पाकिस्तानी सेना र केही प्रहरीहरु समेत रहेको बताइएको छ । बीएलले ती यात्रीहरुलाई युद्धबन्दी भनेको थियो । र, यात्रीहरु सकुशल रिहाइ चाहने हो भने आफ्ना कार्यकर्ताहरुलाई ४८ घण्टाभित्र विनासर्त रिहाइ गर्न सरकारसँग माग गरेको थियो ।
बलुचिस्तान हाल पाकिस्तानको एक प्रान्त हो । यहाँ बसोबास गर्ने केही व्यक्तिहरुले अलग्गै स्वतन्त्र देश माग गर्दै सशस्त्र संघर्ष सुरु गरेका थिए । उनीहरु भारतबाट पाकिस्तान अलग हुँदादेखि नै स्वतन्त्र देश चाहन्थे । तर उनीहरुको माग सुनुवाइ भएन । त्यसैले अहिलेसम्म त्यहाँ सशस्त्र संघर्ष जारी छ । बीबीसीका अनुसार बलुचिस्तानमा स्वतन्त्रताको माग गर्ने धेरै संगठनहरु छन् । तर सबैभन्दा शक्तिशाली संगठन बलुचिस्तान लिबरेसन आर्मी (बीएलए) हो । यो सन् १९७० को दशकको सुरुदेखि अस्तित्वमा आएको हो । तर यसको प्रभाव २१ औं शताब्दीमा बढेको पाइएको छ । उसको भनाइ अनुसार बलुचिस्तानका संशाधनमा त्यहाँका बासिन्दाको मात्र हक छ ।
यस संगठन चीन-पाकिस्तान आर्थिक ट्रान्जिट परियोजनाको विरोध गर्दछ । यसले सन् २०१८ मा कराँचीस्थित चिनियाँ वाणिज्य दूतावासमा आत्मघाती हमला गरेको थियो । हालै चिनियाँ परियोजनामा कार्यरत व्यक्तिहरु सवार एक बसमा पनि यसले हमला गरेको जिम्मेवारी लिएको थियो । यसको गतिविधि हिंसात्मक भएपछि पाकिस्तान सरकारले सन् २००७ मा आतंकवादी संगठनको सूचीमा राखेको थियो । यसलाई अमेरिकाले पनि आतंकवादी संगठनको सूचीमा राखेको छ । सिड्नीस्थित इन्स्टिच्युट फर इकोनोमिक्स एण्ड पिसको तर्फबाट जारी वैश्विक आतंकवाद सूचकांक (जीटीआई) २०२५ रिपोर्टमा पाकिस्तानलाई विश्वको दोस्रो सबैभन्दा बढी आतंक प्रभावित देशमा राखिएको छ ।
